पोर्चुगलमा जमेको नेपाली संगीत
काठमाडौं। नेपालमा झ्याइँकुटी झ्याई टेलिशृङ्खलामा घिन्ताङे पात्रसँगै दोहोरी साँझ, भजन, लोकदोहोरी क्षेत्रमा सक्रिय शम्भु सिलवाल छ वर्षअघि विदेशी भूमि पोर्चुगल गएपछि प्रायःजसो नेपाली गीत सङ्गीतका कार्यक्रममा व्यस्त भइरहन्छन्।
नेपालीको संख्या अत्याधिक रहेकाले त्यहाँ कार्यक्रम पनि लगातार भइरहन्छ। उनलाई सङ्गीतको नशाले छाड्न सकेन तर पछिल्लो एक वर्षयता कोभिड–१९ का कारण कार्यक्रम ठप्प छन्। उनको गीतसङ्गीत र अभिनयप्रतिको मोह घटेको छैन्।
उनले यो समयमा लगभग आधा दर्जन म्युजिक भिडियो निर्देशन, सम्पादन गरेर यूटुबमार्फत सार्वजनिक गरिसकेका छन् भने युरोपकै कथामा आधारित हैट युरोप टेलिशृङ्खला निर्देशन गरिरहेका छन्। साथै उनले लोक दोहोरीको कार्यक्रम चौतारी र नेपाल बाहिरका नेपाली कार्यक्रम पनि उत्पादन गरेर यूटुबमार्फत प्रसारण गरेका छन्।
जेबी ओली वैदेशिक रोजगारको सिलसिलामा छ वर्षदेखि पोर्चुगल रहदै आएका छन्। नेपालमा हुँदा लोक तथा दोहोरी गायन क्षेत्रमा छुट्टै पहिचान बनाउन सफल गायक ओलीले आफू र आफ्नो परिवारको उज्वल भविष्य बनाउने सपना देखेर युरोपेली मूलुक बेल्जियममा साङ्गीतिक कार्यक्रममा गएका बखत उतै बस्ने निर्णय गरे।
उतै बस्ने मन पटक्कै थिएन सङ्गीत क्षेत्रमा अस्वस्थ प्रतिस्पर्धाको कारण कलाकारिताको बजार नभएको र आफ्नो गुजारा चलाउन कठिनाई भएपछि मनलाई दर्हो बनाएर उतै बसेको उनी बताउछन्। प्रवासी भएपछि आफ्नो रुचिको पेशालाई समय दिनै समस्या आएको उनले बताए।
उनले सुरुसुरुमा आफ्नो काम, बसाइँ अनुमतिपत्र बनाउनतर्फ मेहनत गर्नु पर्यो। पोर्चुगलको बसाइँ अनुमतिपत्र बनेपछि आफ्नो कामबाट समय निकाल्दै साङ्गीतिक कार्यक्रममा सहभागी भएर आफ्नो गायन कला प्रस्तुत गर्न थालेको उनी बताउछन्।
दुई दर्जन बढी चर्चित लोकगित सङ्गीत पारखीको माझमा पस्कनुका साथै लाइभ दोहोरी प्रतियोगितामा प्रथम भएका गायक ओली पछिल्लो समयमा युरोपेली मूलुक स्पेन, डेनमार्क, नर्वे, बेल्जियमलगायतका देशमा नेपाली समुदायले आयोजना गरेका विभिन्न कार्यक्रममा आफ्नो प्रस्तुति गर्दै आएका छन्।
उनले मञ्चमा कार्यक्रम हुन छाडेपछि भर्चुअल माध्यमबाट सङ्गीत प्रेमीको तिर्खा मेटाउँदै आएका छन्। उनी पनि युटुब, टिकटक र फेसबुक लाइभमा व्यस्त छन्। उनी जस्तै रोल्पाकी अङ्किता मगरको सपना पनि युरोपको बसाइँ अनुमतिपत्र बनाउने सोचाइका साथ दुई वर्षसम्म नेपालमा सिकेको सङ्गीतलाई बिट मार्दै पाँच वर्ष पहिला विदेश पलायन भएकी थिइन्।
हाल उनी पोर्चुगलमा छिन्। उनी वैदेशिक रोजगारसँगै आफ्नो गायन पेशामा निरन्तर रहन्छिन्। उनले एक दर्जनभन्दा बढी लोकगित र आधुनिक गित बजारमा ल्याइसकेकी छन् भने केही गीत पोर्चुगलमै रेकर्ड गरेर बजारमा आउँदै छन्। उनी पनि अहिले सामाजिक सञ्जालको प्रयोगमार्फत आफ्ना शुभचिन्तकलाई मनोरञ्जन दिँदै आफूले पनि सङ्गीतलाई निरन्तरता दिँदै आएको बताइन्।
हार्मोनियम लिएर प्रायःजसो फेसबुक लाइभमा देखिने अर्का गायक पूर्ण अर्याल नेपालमा छँदा स्कुले जीवनबाटै अतिरिक्त कार्यक्रममा सहभागी हुँदाहँुदै गायन क्षेत्रमा लागेका थिए। अर्याल थुप्रै लोकदोहोरी गीति एल्बम निकाल्दै, प्रत्यक्ष प्रतियोगितामा सहभागी हुँदै आफ्नो कलाकारितामा सक्रिय भएर लागेका थिए। राजनीति र व्यवसायमा सक्रिय चिजकुमार तामाङ पोर्चुगलमा पुराना र सहयोगी व्यक्तिमा गनिन्छन्।
पछिल्लो समय कोभिड–१९ का कारण पोर्चुगलमा कार्यक्रम भएका छैनन्। उनी पनि अहिले प्रायःजसो सारङ्गी, मादल र हार्मोनियमसँगै फेसबुक प्रत्यक्ष प्रसारणमा नै देखिन्छन्। कोभिडले त्रास र तनाब त छ्दैछ, भाषणको जिन्दगीबाट फुर्सदको यो समय उनको लागि छुट्टै आनन्दले बितिरहेको उनी बताउछन्।
स्कुले जीवनमा सिकेको सङ्गीत र व्यस्तताले गुमाउँदै गरेको रहर अहिले फेसबुक लाईभमार्फत पोख्नुको खुशी उनी बारम्बार व्यक्त गर्दै पुराना कालजयी गीत प्रस्तुत गरिरहन्छन्। यी त पोर्चुगललाई कर्मथलो बनाएका कलाकार पात्रहरु मात्रै हुन्।
पोर्चुगलमा थुप्रै कलाकार छन्। कोभिड–१९ का कारण काम गुमाएर बस्ने नेपालीको संख्या अत्यधिक छ। यस्तो प्रतिकूल अवस्थामा कलाकारले आफ्नो कलालाई यसरी प्रस्तुत गर्दै मनोरञ्जन प्रदान गराइरहदा दर्शकको उत्साहजनक सहभागिता र सकारात्मक प्रतिक्रिया आएको उनीहरु बताउँछन्। रासस
समाचार र भिडियो हेर्न तल का लिंकहरु मा क्लिक गर्नुहोस्
